Miño
A súa privilexiada situación convérteo nun dos centros de veraneo máis importantes das Rías Altas.
Miño ofrécelle ao turista moitos atractivos para o seu tempo de lecer, tanto no mar coma na montaña. É un municipio costeiro situado na ría de Betanzos, nas denominadas Mariñas Coruñesas, que posúe desde o ano 2000 a denominación de Municipio Turístico, outorgada pola Consellería de Turismo da Xunta de Galicia. Limita ao norte con Pontedeume, ao leste con Vilarmaior e ao sur con Paderne e Irixoa.
Atravesan o municipio tres ríos. O río Lambre discorre por unha ruta chea de encanto e ten a súa desembocadura na ponte do Porco, formando a praia da Alameda; o río Baxoi, na rúa do Camiño Inglés, atopa ao longo do seu curso unha fonte gótica e un merendeiro onde facer unha parada para descansar e, finalmente, a súa canle discorre ata a súa desembocadura na Praia Grande formando a marisma ás súas portas. En terceiro lugar, o río Xarío pasa polas parroquias de San Xoán de Vilanova e Perbes e desemboca nun costado da Praia Grande de Miño.
Un percorrido polas oito parroquias de Miño permite gozar coas súas casas nativas e de labranza, cos seus hórreos e terras de cultivo xunto a muíños de auga, os seus pazos cos amplos xardíns e as fontes, as súas igrexas e santuarios románicos, góticos, barrocos e modernistas.
Miño conta cunhas magníficas praias aptas para o baño, o descanso e a práctica de distintos deportes náuticos como piragüismo, remo, vela e windsurf, entre outros, que concentran a maior parte do atractivo turístico deste lugar natural.
|
Hoteis
|
